“Ухаан орсон цагаасаа хойш зөвхөн хөлбөмбөгийн төлөө “номын мөр” хөөх хувраг мэт амьдарч байгаа минь хүсэл тэмүүлэл, мөрөөдөлдөө хөтлөгдсөн сонголт…” Хөлбөмбөгийн домогт дасгалжуулагч Арсен Венгер энэ номдоо тоглогчоос дасгалжуулагч болсон замнал, үнэт зарчим, манлайлал, менежментийн туршлагаа хуваалцжээ. Тэрээр Арсенал клубийг “ялагдашгүй” болгож, дэлхийд танигдсан баг болгон хөгжүүлэхдээ залуу авьяастныг нээх, сахилга бат, сэтгэлзүй, хооллолт, бэлтгэл, тоглолтын хэв маягт шинэчлэл хийсэн түүхээ өгүүлдэг. Мөн спортын шинжлэх ухаан, инновацыг хөлбөмбөгт нэвтрүүлэх, цэнгэлдэх хүрээлэнгийн бүтээн байгуулалт, санхүүгийн эрүүл тогтолцоо, клубийн философи ба үнэт зүйлсийн чухлыг онцолсон нь энэ бүтээлийг зөвхөн спортын намтар бус, удирдахуй, хөгжлийн талаарх үнэ цэнтэй ном болгожээ. Өгүүлэгч: Б.Пүрэвдагва Найруулагч: Д.Баярнэмэх "МBOOK" студид бүтээв. Зохиогчийн эрх хуулиар хамгаалагдсан 2025 он.

"Арсен гэж хэн бэ?" хэмээн гоочлуулж байсан Венгер 20 гаруй жилийн хугацаанд хийсэн өөрчлөлтүүдийг "Венгерийн хувьсгал" бүтээлд нэгтгэж, цогцоор нь, товч бөгөөд оновчтой илэрхийлжээ. Тоглогчдын хоолны дэглэм, тамирчдын сахилга бат, бэлтгэлийн талбай дахь өөрчлөлт шинэчлэлт, тоглолтын хэв маяг, шинэ цэнгэлдэх, багийн санхүүгийн бүтэц зэргээс эхлээд шинэчлэгдсэн философи, үнэт зүйлс бүхий глобал клубийг хэрхэн байгуулсныг уг бүтээлд өгүүлжээ. Ялалт ялагдлын торгон агшин, тоглогч дасгалжуулагчдын төдийлөн ил болоод байдаггүй онцгой харилцааг ч харуулсан байна. Мөн “ялагдашгүй” багийг хэрхэн цогцлоов, амжилт ялалтаар дүүрэн эхний 10 жил хэрхэн өндөрлөв, санхүүгийн бэрхшээлтэй нөхцөлд хэрхэн клубийн амжилтыг тогтвортой хадгалж, залуу тоглогчдод итгэл хүлээлгэв, хэрхэн санхүүгийн хүнд нөхцөлийг туулж клубийн амжилттай ажиллах суурь нөхцөлийг бүрдүүлэв гэдгийг өгүүлдэг. Товчхондоо, хөлбөмбөгийн түүхэнд нэр нь тодоор бичигдэж үлдсэн энэхүү эрхэм Арсенал клубийг хэрхэн шинээр бүтээж бий болгосныг энэхүү бүтээлээс мэдэх боломжтой билээ. Хөлбөмбөгийн хорхойтнууд төдийгүй аливаа зүйлийг шинэчилж, бүтээн бий болгохыг хүсэмжилж буй хэн бүгдийн алдалгүй унших бүтээл юм.