Д.Нацагдоржийн болон МЗЭ-ийн нэрэмжит шагналт зохиолч Цэрэнтулгын Түмэнбаярын өгүүллэгүүдийг манай уншигчид сайн мэднэ. Манай цахим номын худалдаагаар номын цахим болон сонсдог ном хэлбэрээр “Дөргөнэ хатны алтан зоос” хэмээх 2013 оноос өмнө бичсэн өгүүллэгийн шилмэл түүвэртэй нь танилцсан билээ. Энэхүү “Мэлмийн гүнд” өгүүллэг, туужийн ном нь “Дөргөнэ хатны алтан зоос” хэмээх шилмэл түүвэрт нь ороогүй 2013 оноос хойш бичсэн шинэ өгүүллэгүүд, мөн урьд нь төдийлөн олны хүртээл болж чадаагүй хоёр тууж нь орсон байна. Зохиолчийн сүүлийн шинэ түүвэр нь “Дөргөнэ хатны алтан зоос” ном дахь өгүүллэгүүдээсээ нэлээд ялгаатай бичигджээ. Чухам юугаараа хэрхэн ялгагдахыг уншигч та өөрийн оюун ухаанаар тунгаан бодно биз ээ. Тус түүвэрт түүхэн сэдэвт “Манжуурын толгод”, “Утгын чимэг” богино өгүүллэгийн наадамд дээгүүр байрт шалгарч асан “Монгол гутал”, “Нангиад хатан” зэрэг өгүүллэгүүдээс гадна хүний эгэл амьдрал, хайр сэтгэл, эцэг эхийн элбэрэл, хүний дотоод сэтгэл, далд ухамсарт нэвтэрсэн өвөрмөц өгүүллэгүүд орсон байна.

“Дөргөнэ хатны алтан зоос” шилмэл өгүүллэгийн түүвэр нь Ц.Түмэнбаярын 1985-2012 хүн хүртэл 30 аад жил бичсэн өгүүллэгүүдийнх нь шилмэл 50 гаруй өгүүллэгээс бүтсэн байна. Энэ түүвэрт “Утгын чимэг”-т шалгаран оролцсон арав гаруй өгүүллэг орсон. Эх орон, түүх, бичиг соёл, хайр сэтгэл, эцэг эх, хүн чанар, шинжлэх ухаан, хөдөө нутаг, нүүдэлчний ахуй, дайн байлдаан зэрэг өргөн сэдвийг хамарчээ. Уншигчид судлаачдын анхаарлыг ихэд татсан түүх домгоос сэдэвлэсэн “Удган”, “Дөргөнэ хатны алтан зоос”, “Цагаан сүүний домог”, Өндгөн чулууны домог”, “Урд уулын зэрэглээ”, орчин үеийн техник технологийн ололт дутагдал, түүний эерэг сөрөг талыг илтгэн харуулсан “Интернэтийн амраг”, “Үхлийн вэб сайт”, хүний мөн чанар, нийгмийн өөрчлөлтийг даган хүний сэтгэлзүй хэрхэн өөрчлөгддөгийг илэрхийлсэн “Харалган”, “Тайган”, “Үүлс үймсэн шөнө”, “Есүсийн шавь” зэрэг өгүүллэгүүдийг онцлон нэрлэж болно. Энэ түүвэрт орсон зарим өгүүллэгүүд нь Монголын шилдэг өгүүллэгийн түүврүүдэд орсноос гадна Орос, Хятад, Унгар, Солонгос, Франц, Казакстан зэрэг улсад орос, англи, унгар, солонгос, франц, хятад хэлээр орчуулагдан хэвлэгджээ.