Хараал жатга их олон төрөл байдаг гэдэг. Үүний дотроос “Цусан тахил” гэгч хараал хамгийн хатуу бөгөөд энэ хараалыг хийхдээ бярууны зүрхийг амьдаар нь сугалж, цусаар нь хар зүгийн тэнгэрийг ундаалдаг билээ. Энэ хараалыг эзэн рүү нь буцааж болохоос биш, дарж болдоггүй гэлцдэг. Хурандаа Наваан яг энэ айхтар хатуу хараал жатгаар Хар тамхитай тэмцэх газрын дарга болохоор шийдэж, тус албаны дарга хурандаа Болдын амийг авхуулахаар ад тийрэн шүтэгч түвд гэгч хар хэлт зайран дээр очиж, тус нүгэлт үйлээ хийлгэж, Болдын амийг авхуулахаар аймшигтай хий биет зэтгэрийг түүн рүү гүйлгэнэ. Энэ хий биет зэтгэр нь тэр шөнөдөө л Болдын амийг авахаар зовоож эхлэх бөгөөд Болд ёстой жинхэнэ хараагүйгээ харж, хар толгойгоо алдах дээрээ тулна. Ядаж байхад яг үүнтэй давхцаад Монголын хар тамхины зах зээлийг бүрэн хяналтдаа авч, дархлагдах гэсэн “Шар шувуу” гэгч гэмт бүлгийнхэн түүнийг алахаар бас шийднэ.

Гэсгээл цээрлэл үгүй нүгэл байхгүй гэдэг. Тэр тусмаа бусад руу жатга гүйлгэвэл, түүний хариуд өөрийнхөө хар толгойг алдаад зогсохгүй цаашлаад үр үндсээрээ сүйрэх ч эрсдэлтэй нүгэлт үйл билээ. Арван сарын өмнө Навааны гуйлтаар хурандаа Болдын амийг авах гэж гүйлгэсэн хараал жатгыг нь Бэгтэр зайран өөр рүү нь буцааснаас болж гурван ч ач хүүгээ булшилсан Түвд бөө, үлдсэн хоёр ач охиноо алдахгүйн тулд Бэгтэр, Болд хоёрыг үгүй хийхээр эцсийн сумаа тавина. Болд үүнийг нь эхэндээ огт мэдэхгүй. Байдал ийм ноцтой болоод байхад түүний бүх анхаарал сэрэмж нь, өөрсдийнхөө хамаг хэргийг Хярс тэргүүтэй бүлгийнхээ залууст үүрүүлээд, ямар ч ял шийтгэлгүй мултарч чадсан Ухнаа, Шараа хоёрыг торны цаана хийх хэргийн баримт цуглуулах чухал ажилд хандсан сиймхийгээр хар тамхины үнэ тэнгэрт тултлаа өссөн нь тус бараан мөртэй бохир бизнест хараахан гар дүрээгүй байсан, хууль хүчний байгууллагад том ар талтай дархлагдсан эрүүгийн нөлөө бүхий гэмт хэрэгтэн болох “Халгай” гэгч юу ч хийхээс буцахгүй эрийн бүлгийн асар их ашиг олох талбар болсон бөгөөд тэд, баривчлагдаагүй үлдсэн цөөн тооны жижиг бүлгүүдийн ихэнхийг хүчээр атгадаа хийн нэгтгэж, улам цохион байгуулалтай болгосон учир буцаад л хүрээгээ тэлж эхэлсэн байна. Гэвч тус Халгайн бүлэг ардаа маш нөлөөтэй хамгаалалттай хэдий ч хурандаа Болдыг замаасаа зайлуулахгүй л бол өмнөх том бүлгүүдийн золгүй хувь тавиланг давтах учир түүнийг албан тушаалаас нь огцруулах, энэ нь бүтэхгүй аваас амийг нь хороохоор төлөвлөөд, үүнийгээ хэрэгжүүлэхээр шуурхай хөдөлж эхэлнэ. Ингэснээр хурандаа Болд, хошууч Саруул хоёрын ирээдүй бүр ч бүрхэг болж хувирна....

Болд эхнэр, охин, аав гурвын хамт оройн хоолоо зооглон сууцгааж байтал аавыг нь нэг хүн хамар хашаан дотроос хашхиран дуудсанаар бүх аймшигт явдал эхэлнэ. Учир нь тус хашаан дотроос хашхирсан дууны эзэн нь хэд хоногийн өмнө нас барсан хөрш өвгөний сүнс байлаа.

Төгөлдөр дөнгөж гучхан настай ч өөрийн гэсэн байр, бичил бизнестэй болоод арваад жил болж буй. Гэлээ ч тэрээр Соёлоо, Хожгор гэгч үл бүтэх хоёр эртэй танилцсанаас хойш ажил бизнес нь ер өөдлөхөө болиод зогсохгүй бүр дампуурах зүг рүү эргэлт буцалтгүй эргэсэн. Нөгөө хоёрынх нь ч эрхэлж буй бичил бизнес нь мөн ялгаагүй дампуурч, мань гурав ч дампуурч буй бизнесээ өөд нь татах гэж хэр чадлаараа л хичээж яваа. Гэвч: “Зав гарахаараа л жаахан архи амсдаг!” гэгчээр сархад гудраагүй эрүүл ухаантай үедээ л ажил бизнестээ хачин их санаа тавьдаг учир орлого нь өдөр ирэх тусам багассаар л байв. Ядаж байхад тус гурвын саруул ухаантай байх нь бүрхэг өдрийн үүлэн чөлөөний наран шиг тун ховор болоод нэлээд хэдэн сарын нүүр үзэж яваа. Мань гурав ийм л үл бүтэх нөхөд. Өөрөөр хэлбэл, ёстой нөгөө, “Ухаанд нь ухна ишиг үхчихсэн” үл бүтэх этгээдүүд. Ийм ч учраас мань гурвыг таньж мэддэг бүхэн нь: “Ганган тэнэгүүд” Эсвэл “Бүтэхгүй хэд!” хэмээн яг эзнээ олсон гоё хоч өгсөн. Гэхдээ гурвууланг нь цуг явж байхад нь л ингэж шоолон дуудна. Харин ганц, ганцаараа явж байвал өөр хочоор дуудах бөгөөд Төгөлдөрийг “Давсаг” хэмээн авгайлна. Мань эр худалч гэж тамтаггүй, заль гэж ойгүй учир ийм хоч гуншинтай болсон хэрэг.

Өглөөний нар туссан өргөн ширээний ард гурван эр ноцтой хэргийн талаар хэлэлцэнэ. Тэдний хувьд хүний амь бүрэлгэх нь ашиг олохоос өөрцгүй зүйл. Ялангуяа Оросоо, Төмөр хоёр нь багаасаа гэмт хэргийн ертөнцөд орж, элдвийг үзсэн хатуужилтай дээрэмчид бөгөөд амьдрал нь адал явдалт кино шиг өнгөрчээ.